KIA Masat (7) Dap Dung Ginra Hta Matut Gasat Gala Majan Byin

KIA Masat (1) Dap Ba, Masat (7) Dap Dung makawp maga ginra hta July (15) ya shani Myen Asuya Hpyen Dap, Dap Nu (33) hte Hk.L.Y (137, 138, 66, 47, 29) dap na pawng hpawn hpyen hpung ni KIA Masat (7) Dap Dung, Mali Awng Mai Post hpe htim gasat ai a majaw gasat gala majan byin lai wa sai.

KIA Masat (7) Dap Dung ginra hta Sumpra Bum sinpraw maga deng (9) daram tsan ai kaw nga ai Mali Yang mare makau grupyin hta Myen Asuya hpyen dap ni hte KIA hpyen hpung ni July (11) shani kaw nna gasat gala majan jahkring jahkring byin wa ai majaw mungshawa ni hpyen koi yen hkawm nga ai.

Gasat gala majan byin ai mare ni hta na Mali Yang mare na mungshawa marai (85), Lawt Mai Yang Mare mare na marai (180) gaw Ja Ra Yang hte Nhtan Zup mare de hpyen koi yen htawt sit nga ai. Hpung In Yang mare na mungshawa nkau nam maling kata de hpyen koi rawng nga ai.

Matut nna KIO Asuya lawu tsang jawng (5) pat kau ra ai majaw laika hpaji sharin hkam la nga ai jawngma marai (271) jawng bai matut lu lung na matu yak hkak nga ai. Bai nna, ma shapan jawng (5) hpe mung pat kau ra ai lam ni nga ai.

Bai nna, July (16) ya jahpawt Myen Asuya hpyen dap ni kawn hpyen n-gun (700) jan daram hte KIA Masat (7) Dap Dung kata na hpyen hpung ni makawp maga nga ai Mali Awng Post hpe n’gun kaba hte htim gasat shang ai a majaw KIA Mali Awng Post hpe yen kau da ra ai. Gasat gala majan byin ai nga ginra hta Myen Asuya hpyen dap ni kawn Jet Figther nbungli (2) hte lung wa ai raitim lamu marang nhkrak ai a majaw bai nhtang wa mat ai nga nna shawnglam ginra hta nga ai kawn tsun ai.

July (11) ya shani Myen Asuya hpyen dap ni kawn KIA Masat (7) Dap Dung kata na hpyen hpung ni hpe Jet Figther nbungli hte gap gasat ai lam ni galaw lai wa sai.

Ya na zawn htim gasat ai lam gaw shawng de Myen Asuya hpyen dap ni shara jahkrat dap jung lai wa sai ginra hpe bai dap shara jahkrat mayu ai lam sha n rai na re, Mali Yang mare Hkanam maga kaw Asia World Company ni a wan jak masing shara langai nga ai, dai masing hpe bai matut galaw lu na matu KIA ni hpe shara yeng seng kau ai lam rai na re nga nna masam maram da ai lam ni nga ai.

Sharing

 jinghpawland.com

请扫描左边的黑白二维码图片，即可识别关注“景颇大地”公众号