KIA Mali Yang post hta Myen lagaw dap hte man chyaw gap hkat nga
KIA Mali Yang post hta Myen lagaw dap hte man chyaw gap hkat nga
Kachinnews
Published: 12 July 2015
Jet nbungli hte sa gap ai lani a hpang, dai hpawt hkying 5 am daram kaw nna KIA Dapdung 7 Mali Yang post hta Myen hpyen lagaw dap ni hte gasat poi byin hpang sai lam, Dapba 1 daju N’Gumla shiga lawk tsun ai.
Mani gaw Myen hpyen maga Myitkyina de na jet nbungli 2 hte hkying 11:30 am hta kalang hte hkying 3 pm hta kalang, Mali Yang post hpe wa gap gasat ai lam, Dapba 1 salang ni Kachinnews de tsun shateng ai.
Bai nna, Myen asuya uphkang ai Sumprabum Mada Sawn kaw nna mung Mali Yang de matut manoi laknak kaba ni gap garum ya nga ai lam, chye lu ai.
Myen hpyendap gaw Mali Yang post hpe zing la na matu June 24 hte 27 ya shani hta sa htim gasat wa sai re. Raitim shanhte maga sum machyi ai lam law ai majaw Sumprabum de bai htingnut mat nna, n-gun gahkyin nga ai re.
Ya kalang bai jet gasat nbungli 2 hte laknak kaba gap garum ya ai npu, Myen hpyen ni gaw KIA uphkang ai ginra Mali Hkrang Walawng hte madung pru-shang chyinghka, Mali Yang post hpe zing na gasat nga ai re.
Raitim, daini Laban Ya shani du hkra gaw KIA maga ja ja ninghkap nga dingyang re majaw Mali Yang post hpe Myen hpyen ni n lu zing ai lam, Dapba 1 salang ni tsun ai re.
2011 ning Myen hpyendap hte KIA majan n’nan bai byin wa nna, Hka Garan Myen dap hpe KIA ni hpya kau ai hpang, Myen hpyen ni yen hkau ai Mali Yang post hta KIA Dung 7 ni galai dung ai re.
Ya kalang bai Mali Yang post hpe zing na shakut ai ndai sat lawat gaw, KIA hpe Mali Hka a sinna hkran maga n nga shangun mayu ai masing rai na maram ai lam, Laiza na KIO Ningtau Ninggawn Amu Madu, Salang Kaba Labang Doi Pyi Sa tsun ai.
Shanglawt ginra de hpyen hprawng masha ni du
Majan laja wa ai majaw, dum nta hkinggaw 40 jan nga ai Mali Yang mare masha ni yawng, ya ten Mali Hka sha din ai, KIA Dung 7 uphkang ginra Ja Ra Yang mare de hprawng yen nga sai lam chye lu ai.
Hpyen hprawng masha ni hta malu masha, tsi mawan, nga shara ginsum, lam shagu hta ra kadawn nga ai lam Dapba 1 salang ni tsun ai re.
Myitkyina de jak li hte madung matut mahkai ai lam hpe June 29 ya kaw nna Myen hpyendap maga pat hkum tawn ai re.
KIA Mali Yang post gaw Sumprabum a sinpraw maga lamu hku deng 8 jan (lagaw lam hku deng 20 daram) tsan ai, Mali Hka a sinna hkran hta nga ai re.
jinghpawland.com
请扫描左边的黑白二维码图片，即可识别关注“景颇大地”公众号
