Myan Asuya Dat Kasa Hpung ni hte Myen Mung Mung Hpawm Amyu Sha Dap Kasa ni kawn Myen Mungdan ting gap hkat jahking lu na matu lang hte lang hkrum zup bawngban ai lam galaw nga dingyang raitim gasat gala majan laja lana byin nga ai.

KIA Masat (6)Dap Dung ginra, Nam Yung Pa maga kawn lung wa ai Myen Asuya hpyen dap Hk.M.Y (422, 428) dap na pawng hpawm hpyen hpung ni June (16) ya (2:30)pm aten Nam Yung mare Salang U Gaw Tu hpe lam madun woi nna Du Lachyung Mung Ra hpung ni shara jahkrat dap jung nga ai Lai Si Bum de sa htim gasat lung wa ai hpe KIA hpyen hpung ni hkap shingla gasat ai raitim hpyen n-gun n bung ai a majaw KIA hpyen hpung ni makawp maga nga ai Post yen kau da ai.

Bai nna, June (17) ya (8:00)am kawn (11:00)am laman Nam Jan maga na lung wa ai Myen Asuya hpyen dap Hk.M.Y(424) ni kawn KIA hpyen hpung ni dap jung nga ai Naw lang Post hpe htim gasat ai hpe hkap shingla gasat gala ai raitim Naw Lang Post hpe mung yen kau da ai.

June (17) ya (12:00)pm kawn (2:00)pm du hkra Lai Si Bum kaw du nga ai Myen Asuya hpyen dap Hk.M.Y (422, 428) dap na Pawng hpawm hpyen hpung ni KIA hpyen hpung ni shara jahkrat dap jung nga ai Mai Sak hka mazup grup yin maga de (60)mm, (81)mm ni hte matut manoi gap bun nna, Nam Jan hka hku Awng Len Yang mare na Lup Wa Kawng maga hku htim gasat lung wa ai hpe KIA hpyen hpung ni hkap shingla gasat ai kawn gasat gala majan matut byin lai wa ai.

Myen Asuya hpyen dap ni gap ai sinat laknak si kaba KIA hpyen hpung ni makawp maga dung jung nga ai ginra hta hkrat ang ai a majaw Gyi Jum Hka Hkran Hkawng sinat laknak si kaba hkra nna asak si sum mat ai lam shawng lam shi sawk ni kawn chye lu ai.