KIA Masat 12 Dap Dung Ginra hta Hpun hpaga ga baw hte Nam Lim Pa, Kawng Ra mayan grup yin hta shamu shamawt hkawm nga ai Myen Hpyen dap Hk.L.Y (15,56,86,142) hte Hk.M.Y (321,601) pawng hpawm hpyen hpung ni shanhte dap de dawm wa ai lam nnga ai sha n-ga naw shamu shamawt chyinglau hkawm ai lam hpe chye lu ai.

Bai May (23) ya shani hkying 8:10am aten kawn Nam Hpalang Bum Grup yin gasat gala majan byin nna wa ai Myen hpyen dap Hk.L.Y (56,86) pawng hpawm hpyen hpung ni Loi-aik Bum (point792) kaw du shang nga nhtawm shana daw hkying 5:00pm aten daram hta Nam Lim Pa mare baw kaw KIA Masat 12 na Hpyen hpung ni hte matut manoi gasat gala majan matut byin nna Myen Hpyen dap ni KIA hpyen hpung ni nga ai Nam Hpalang Bum maga Laknak kaba gap bang nhtawm matut htu shadut lung ai ai majaw dai shara hta gasat gala majan bai matut byin ai lam na chye lu ai.

Matut nna May 23ya shani hkying 5:00pm aten hta KIA Masat 12 Dap dung ginra Namlim Pa shara maga de hpyen n-gun garum lung wa ai Myen hpyen dap Hk.M.Y437 dap ngu na lu ai hpyen n-gun 50 jan htaw lung wa ai Modo 3 hpe May 24ya shahpawt hkying 7:45am aten daram Hkan Htet maga de lai lung wa ai kaw KIA masat 12 Dap Dung na Hpyen hpung ni Manta hte Mawng Hta Lapran hkap shingla gasat dat ai hta Myen hpyen modo langai lu jahten kau ya ai lam hpyen shisawk ni shiga jaw la ai kawn chye lu a.