Asuya pawnghpawm dap hte Saga Nam Hkum majan hta KIA (3) hkala

Asuya pawnghpawm dap hte Saga Nam Hkum majan hta KIA (3) hkala

Jinghpaw mungdaw, Manmaw ginwang Mabing myu-ne Wunpawng Mungdan Shanglawt Hpung (KIA) Dap Dung (12) ginra Saga Nam Hkum hta asuya dap hpawm ni Je U, Nam Hkan maga kawn htim lung shamu shamawt wa ai majaw Oct. 23 bat Masum Ya shani laja lana majan byin mat wa nna KIA hpyenla marai (3) hkala ai lam chye lu ai.

Saga Nam Hkum makau du nga ai asuya dap Ts.K.Hk Masat-21 (Manmaw) npu pawnghpawm dap dung kawn n-gun (300) hkawt hte KIA Dap Ba (3) npu Dap Dung (12) ni gap hkat nga ten KIA maga na marai (3) hkala mat ai re nga KIA Masat (12) Dung Up Dkb. Labang Jawn Awng tsun ai.

Asuya dap maga mung hkrat sum ai hte hkala ai marai (20) hkawt nga na re nga KIA kawn maram tsun ma ai.
 
Dai majan gaw asuya hte Wunpawng Mungdan Shanglawt Hpung (KIO) lahkawng maga myit hkrum da ai hte maren lam ni kalang bai hkrang wa lu hkra KIA Dap maga na lam maw kawn mita (1,000) gang ai shara de htingnut da ya ai hta asuya dap ni htim lung shamu shamawt wa ai majaw majan byin mat wa ai re nga Dung Up Dkb. Jawn Awng KNG Jinghpaw Shiga Dap de tsun ai.
 
“Anhte maga htingnut da ai shara kawn asuya dap ni deng (10) tawt lai shang kabye htim ka-up lung wa ai nga yang byin mat wa ai le. Asuya gaw simsa lam n ra ai gaw. Simsa lam lu yang shanhte shara n lu na tsang ai majaw myit hkrum da ai lam ni hpe jahten ai masa hku na KIA shara ni hpe hkan zing nga ai re. Gap hkat n jahkring ai gaw KIA sha re nga yang ladat hkum hkra hte jahkrit shama nga ma ai” nga shi mu mada ai.

Mani majan byin ngut ai hpang dai asuya pawnghpawm dap gaw htingnut ai lam n nga shamu shamawt nga dingyang re majaw daini mung majan matut mai byin ai nga tsun wa ai
.
 “Ya grai kahtep taw nga ai. Shanhte ga shaga ai hpyi na ai. N mu na n gap ai re.”

Je U, Nam Hkan, Man Ta, Mung Ding Pa, Tantada, Gawng Run mare grup grup hta asuya hpyen n-gun (1,000) jan hte shamu shamawt nga ai re lam chye lu ai.

Nam Lim Pa na KIA tsin-yam dabang makau hta majan byin wa ai majaw makau na tsin-yam dabang a matu tsang nga nna dabang kalang bai htawt sit masing ni nga wa ai baw re lam tsin-yam masha hte seng ai ni tsun ai.

 jinghpawland.com

请扫描左边的黑白二维码图片，即可识别关注“景颇大地”公众号